上星期差唔多成都係病中渡過，搞到完全無理過任何投資咁滯，本來上星期五見到隻中移動再次升空，今個月既股票期權都應該凍過水，但好好彩中移動今日又表演跳水，單日下挫超過3%，結果俾咗我一度逃生門，雖然仍然要蝕少少，但總算無夾死，繼三月之後，又玩咗一次中移動過山車。展望五月，主題仍舊係五絕，造淡仍然向中移動埋手，所以沽咗@82.5既call。
但連續兩個月既大幅波動，令我更加決定要減少單一股票既投機，下個月會搬啲錢過恆指倉。
至於恆指倉方面，今日急跌差唔多將上個星期既升幅食晒，結果期權又處於有微利既狀態，只要今個星期頂住喺20400樓下，咁最後果300點又可以食埋嘞！
至於期權倉實際表現，今晚稍後更新。
上星期六朝去學配音既時候，遇到有童軍喺街賣旗(好似係幫基督教什麼協助會)。行過幾步又有同一個機構既人賣旗，不過今次就無著制服，應該係童軍團隊要求成員參與時要著制服，但其他義工就無特別限制。
雖然到最後我兩個都無幫趁，但其實個童軍approach我既時候，我有諗過幫佢買枝旗，但另外一個人，我就諗都無諗過。
因為香港而家實在太多掛羊頭賣狗肉既「慈善」活動。好似早兩個星期新聞講有人申請咗「慈善」義賣，但其實都只係做小販，根本無人知啲「善款」去咗邊。
但我有個偏見，覺得童軍、聖約翰呢一系類團體，唔會同啲不明來歷既機構合作。雖然我只係好天真咁將審查既工作交托俾其他人，而自己只係相信對方既權威，但原來大部分人都可能做緊同一件事。
對於某一啲身份，我地都會有一個特定既印象，好似如果你喺醫院有個人著住件白袍走黎走去，好多人直覺上會覺得佢係醫生，而如果你銀行見到有個人著制服而另一個唔駛著，我相信你都會覺得唔駛著嗰個高級啲……尤其是你要投訴既時候，好多人都會對住著制服既同事講：叫你經理出黎！
唔知係唔係同一個原因呢，而家保安員啲制服越來越似警察或者啹喀兵，有次去IFC,見到啲保安著好似啹喀兵咁，真係唔打得都嚇得。
唔經唔覺，今年又係四年一度既奧運會，而今年倫敦奧運既香港轉播權由有線奪得，原本有線打算喺佢既免費頻道播奧運，但由於政府遲遲都未批出牌照，令到有線可能只會喺收費頻道播。而如果無線同亞視唔向有線買轉播權，咁大家就可能無得喺任何免費頻道睇奧運。
當然呢啲時候，又係啲議員出黎抽水既時候，話如果只係得收費頻道播，大部分既市民就無得睇奧運，政府應該介入事件。
其實睇奧運都係欣賞健兒既體育精神同比賽當中既刺激性，再深層次啲咪包括愛國愛港精神，為中港同胞打打氣，係咪真係涉及咁多公眾利益呀？如果大家真係咁認真支持，點解唔可以訂有線去欣賞節目，話晒人地有線都係真金白銀買個轉播權返黎，如果無線同亞視計過條數係值既，自自然然會同有線買轉播權，如果唔俾個合理價而要政府揼有線，咁不如好似大陸咁，由政府統籌所有大型節目既轉播權然後分餅仔俾各大傳媒？
其實我都係無病申吟，講下笑啫。因為我唔想再多一、兩個乜鬼轉播權管理局既高官俱樂部，再加埋啲議員得閒無野做又去爭取政府補貼家家都要有100吋3d電視睇奧運，再加埋法定兩星期假期去睇世界杯……
琴日睇報紙，又有團體出黎話做完研究，話百佳、惠康喺同一地區既貨品，售價都係差唔多，甚至乎同上同落，所以一口咬定兩間大型超級市場聯手定價，剝削消費者。
同我地細果個既時候比較，而家既士多真係少咗好多，好多人都歸咎士多執笠，係因為大型超市上下其手，一方面壓低入貨價同埋收上架費，另一方面又唔俾供應商用低價俾貨士多，令士多唔可以喺價錢上同大型超市競爭。
但唔知大家有無發現，喺傳統士多消失既同時，喺唔同時間都出現緊新既經營者，例如優之良品、零食物語同好識做新聞既759阿信屋。其實佢地所賣既野同我地細個嗰陣既士多無乜分別，都係零食、汽水之類，只不過係門面整潔啲，啲野睇落去新鮮啲，同埋貴啲！
講真，我覺得而家創業既機會真係難咗，但難係唔係難於無機會，而係呢一代既香港人有錢咗，要求高咗。
我敢寫包單，就算領匯肯平租俾你開士多，但係你仍然用舊式既格局去做，即係物種多而亂、啲野成日好似封晒塵咁，過多兩年，一樣會係執笠收場。
上個星期終於換咗個光波爐返屋企，睇咗個簡介，發現參唔多所有可以諗到既煮食方法，佢都可以做到，難怪近呢大半年好多家庭都會買個光波爐返屋企，而Facebook既食譜組群仲有幾千人參加咗添！太座仲已經諗緊將會微波爐送俾人，因為輻射始終對身體唔係咁好，既然光波爐做到微波爐要做既野，倒不如藉此騰出多啲空間。
當我細心睇下個光波爐究竟係咩構造時，我發現其實光波爐都唔係乜野高新科技，原則上係一個上置既發熱器加一個類似康寧既半透明玻璃鍋。
同普通焗爐比較，最大既好處就係個玻璃鍋更易處理同俾你更大既彈性。因為當你要用水既時候(例如蒸、炖)既時候，只須要將水直接注入鍋裡面就可以。而要焗、燒既時候，啲油就會流喺個鍋入便，方便清洗。
相比我以前一個好似洗衣機咁大既焗爐，亦都唔需要預熱，無論喺功能上同節省能源方面，基本上都係一個唔既選擇。太座亦都無浪費一番等待，整咗幾個好好味疍糕仔俾我同囝囝試下。
其實睇到個光波爐，又令我諗起iPhone。點解？下次講。
魚缸經常都充滿住唔同既“傳統智慧”，例如一月效應、十月係股災高危、美國大選年股市例升等等……而黎緊最接近我地即既，就係五窮、六絕、七翻身。
啱啱查完維基百科，話五窮六絕七翻身係經濟分析員根據80~90年代統計出黎既結果。事源係香港上市既公司大部分3月公佈業績，而股息通常喺五月除淨，所以五月開始會下落，直到七月之後再期待中期息，所以股市通常會喺五、六月較弱。
但唔知係而家啲人鍾意偷步炒定係乜野其他原因，我印象之中個市通都會喺四月開始散，然後五月死下死下(應該真係同除淨有關)，到咗六月，可能啲家長要同啲仔女一齊温書(唔係講笑架，我識啲家長真係勤力過啲仔女，有時我都唔知邊個考緊試)，但考完試，啲父母又走翻出黎買股票，個市又好番啲。
尤其是上個星期開始，個市又鬼咁死靜，本住10個牛皮9個淡既信念，我個恆指倉又係向淡。上星期臨收市既時候沽咗3張MHI20400認購，希望個市慢慢咁、靜靜地跌落去20400，咁我就可以食晒啲期權金喇！
希望唔好見光死喇……
期權倉詳情：
成立日期：2012年3月27日
倉位： 沽出3張中移動4月認購@82.5
沽出價：2.9
現價：2.98
按金要求：11,760
現金結餘：24,196
開倉基金：19,846
成立日期：2012年3月30日
倉位：沽出3張恆指4月認購@20400
沽出價：475
現價：424
按金要求：32，130
現金結餘：77，540
開倉基金：77，726
喺恆指成份中，有一隻唔係太多人講，但表現又好好。佢有一個好美麗既故事：市場龍頭、、毛利率高、每年都有強勁既增長……係咪好熟呢？講既唔係幾年前既思捷環球、又唔係瘦肉精事件前既雨潤，而係衛生巾制造商：恒安國際。
點解無端端會講呢隻股票？因為上個星期五睇報紙既時候，有三、四個財演都推薦呢隻股票。印象之中，呢隻上市既時候都係幾蚊雞，賣既係中國幾億既女性市場，後尾再加埋發展其他紙類制造業務，結果就係咁多年黎不停咁升，喺恆指量寛既情況下做埋恒指成分股添。
但係我成日諗，其實衛生巾又唔係一啲高科技產品、入場門檻又低，應該係一個競爭激烈既市場。品牌效應可能令佢可以保持高毛利率(我唔駛用，所以唔敢講)，但喺一個競爭激烈既市場，又可以做到高毛利率、又高增長，除咗奇績之外，唔通女人有錢咗，真係會每日用多幾塊？
啱啱過去既週末，除咗去西頁之外，仲睇咗一套西片：孖展風雲。套戲係以金融海嘯為藍本，講貝爾斯登發現自己資不抵債既時候做過啲乜，全套戲無特技、無色情、無暴力，只係班友不停咁講野，但戲味十足，兩個鐘話咁快就完。
故事既結尾，提醒我經濟學既最重要假設：所有人都係自私既。87股災、97樓市暴跌、2000年科網股爆破、金融海嘯，一個又一個危機，造成咗一次又一次既財富再分配。歸根究底，都係因為人類既自私，每次做決定既時候都以自己最大既利益為前題。呢啲利益，未必係錢，亦可以係另一啲隱藏益處，例如名譽或者簡單如別人既關注。
而造成連綿不斷既金融危機，我覺得最大既原因，就係因為呢個世界既OPM(Other people's money)太多，亦都係所謂既管理人風險。相信好多買過基金既人都知道，基金往績並唔等於未來既表現唔等於將來既表現。因為好多時基金經理(個別著名基金除外)係因為佢地既花紅，而唔係為咗投資者既回報而努力。對佢地黎講，花紅唔係以年結就係以季結黎計算，而如果表現唔理想，隨時都有起身既可能性，試問佢地又點唔會為咗基金表現短跑。而如果你買基金係為咗長線回報既話，對唔住，呢個期望既錯配往往就係令人啲血汗錢葬身股海既原因。
我記得大學既時候上過一個關於風險管理既課程，教授第一個問題就係，如果有兩個選擇：
1) 可以穩定地賺$45
2) 50%機會賺$100，50%輸晒
答案無啱同錯，選擇邊個完全係因為你既風險取向。但如果我話贏就你既、輸就我埋單，你估你既風險取向會係高定低呢？
喺股壇馳騁咗十幾年之後，我認識到股票投資(或者賭博)都係一種專業。試諗下如果叫你連續full time做一樣野十幾年，只要你唔係太唔上心既話，無論技巧同觸覺都應該比一啲業餘人專好一啲，而好多時就憑住呢一點點既分別就可以成功擊倒對手。而大部份既散戶(包括我自己)都係以業餘既心態去「玩」股票，結果當然係喺呢個食人唔lun骨既戰場裡面傷亡慘重。
除咗減少咗主動買賣以減少錯誤之外，好多時我都會參考明燈(可參考“明燈是怎樣練成的”)既指引去做決定。其中最鍾意各大報章既財演們，因為當佢地口徑一致時，通常就係相反理論既最佳出擊機會。
當然有啲明燈就係一啲死都唔認命既人。而今期既主角，就係小弟本人。話說寫完第一篇”輸到人都癲”之後就一直睇淡中移動，而事實就係大市升，佢就一齊升。而個市跌到七個一皮，佢就大嗱嗱跌一毫子！！！有無搞錯呀！！！
如果呢個期權倉一直存在，相信中移動都唔會大跌，如果邊位兄弟想喺中移動身上揾食，就記住揾呢盞燈照住喇！
期權倉詳情：
成立日期：2012年3月27日
倉位： 沽出3張中移動4月認購@82.5
沽出價：2.9
現價：2.89
按金要求：11,901
現金結餘：24,196
開倉基金：19,846
如果有睇過富爸爸既書，相信都會知道富爸爸最重視既就係現金流。一個無論幾好既投資項目，如果需要融資而缺乏現金流既支持既話，都會係一件幾危險既事，因為你永遠唔知你自己既防守力有幾高。
舉個例講，如果你買咗一層收租，但如果每個月既租金收入都唔夠俾供款同管理費，咁你就要每個月自己貼錢出黎。萬一咁唔好彩失業，咁現金流既壓力就會好大。
喺買樓收租既時候，要兼顧既野實在好多，第一樣既當然係租金回報，如果一層樓俾到5厘回報而按息只係兩厘，咁每個月就有3厘落袋，咁理論上就好安全。
但租金呢樣野，有時真係會波動得好利害，我記得零九年金融海嘯既時候，有一層將軍澳既樓，本來月租緊萬三，但個租客喺死約到咗之後就要求減租到九千！雖然討價還價後以一萬續租，但已經大拿拿唔見咗廿幾個%，好彩因為早年買落，每個月都係供緊八、九千。雖然減咗租，但仍然唔駛攞錢出黎。但經過果次之後，我明白到現金流真係一樣好重要既野，因為只要收入斷咗而你仍然要供款，咁你就無晒防守能力，到時就焗住以筍價脫貨。
之後我每次買樓收租都會先放兩年既供款(唔係租金喎)喺供款戶口，雖然未必可以免除晒所有風險，但起碼層樓就算層樓無人租，兩年之內我都唔駛急於賣樓。
期權短倉既其中一個好處，就係無乜大事幹既情況下，你都唔駛點埋佢。好似我而家既咁，要沽既就沽咗，又未遇到夾爆倉既情況。其實又真係無乜野好做。除咗每日開市、食飯同收市望下之外，基本上都係無乜野好做，一點一滴咁賺下啲時間值……
但今日覺得有啲唔係好對勁，朝早望，4月認購做緊3.14，食完飯返黎又係做緊3.14，收市睇做緊3.06。但全日波幅就係3.06 ~ 3.14，只係得94張成交。如果唔係肯定自己已經平晒3月既倉，仲以為睇咗3月既報價添！
全日得94張，以一個貼價期權黎講，絕對係一個偏低既數字，而通常出現呢啲情況，即係爆發力喺道凝聚緊，至於爆上定爆落，就要睇邊面得勝，但無論如何，4月都唔似一個平淡既月份！
期權倉詳情：
成立日期：2012年3月27日
倉位： 沽出3張中移動4月認購@82.5
沽出價：2.9
現價：3.06
按金要求：12,066
現金結餘：24,196
剛過去既週末，去咗一個朋友西貢既屋企玩。因為中間安排咗整麵包既環節，由於個仔仲細，未能夠參與，所以就帶咗佢出去行一陣，睇下有乜野玩。
而家好多大型屋苑都有自己既會所，就算無，都總有啲社區設施喺附近。但當日去既地方，附近除咗一個石地足球場外就乜都無。幸好行下行下，見到有啲流浪貓，就同個仔跟住啲貓貓，睇下佢地瞓覺、點樣為咗逃避我地而跳黎跳去，又玩咗一陣。
後尾又見到有家人喺門口整咗個大鳥籠，養咗兩隻鸚鵡，見我地行過，就喺道不停咁叫，我都未開口講話有雀雀，囝囝就同我講：「爸爸，有鸚鵡呀！」究竟個仔幾時學既呢？我都唔知，不過唔緊要喇……
同鸚鵡玩咗一陣「哈佬」之後，我地又行返去足球場道，本來諗住無野玩返歸，但咁啱有三兄妹帶住個波黎球場玩。大哥見到我個仔對眼發晒光，就問我地想唔想一齊玩？有得玩，梗係唔好放過喇！
三兄妹分別係9歲既大哥、8歲既二哥同5歲既妹妹。細妹可能因為比較細個，跑又唔夠跑，成日都踢唔到個波，所以一掂到個波，就會攞起個波走黎走去，然後兩個哥哥就會跟住佢走，直到細妹放低個波，但整個過程之中，無投訴、無打交，完全只有喺道玩。
當然我個仔就更加細個，所以有時妹妹就變身家姐，見弟弟追唔到既時候就會攞個波俾佢玩，好簡單一個波，4個小朋友就玩咗半個鍾，直到三兄妹而返屋企食飯(其實只係5點半)為止。
行返朋友屋企途中，我問囝囝好唔好玩？佢話好玩，聽日要再黎……
開心，其實可以好簡單。
琴日同個friend講開，蘋果日報既5個「專家」，4個偏淡，一個講咗等於無講，個市似乎跌得七七八八，又係出相反理論既時候。結論係黎緊會有個急升，不過唔肯定係先橫行、再急升定係先急升、然後再橫行。股票方面應該無懸念，應該可以今朝撲入(但可惜今朝要開會，一毫子都無買到……)
反而期權方面可以點樣做呢？3月份既股票期權已經平晒倉。接住黎就要估下中移動點走，根據以住經驗，大市整體升既時候，中移動既表現唔會太突出，所以反而可以趁佢升既時候沽佢既認購期權，但因為琴日佢唔係好郁，所以沽出計劃暫時hold一hold住。
到咗今日開市，中移動果然發揮太山崩於前而不變既定力，中午收市都只係微升幾毫。正當我15、16時，佢食完飯返黎就開始發力。我當時諗似乎都係時候做野，但自從上個月被迫倉之後，都仲有少少淆底。
但貪念戰勝咗恐懼，終於喺中移動大約84.2既價錢沽咗認購期權，目標係4月廿零號中移動會收喺82.5樓下，咁我就可以食晒啲溢價同差價。
守則方面，就會根據期權倉的守則而進行。(但一開波就計錯數、沽多咗……)
至於恆指期權，就要等結算後先開。
期權倉詳情：
倉位： 沽出3張中移動4月認購@82.5
沽出價：2.9
現價：3.33
按金要求：12,192
戶口結餘：24,216
雖然我一次牛熊證都無買過，但對於呢種金融創新下既神奇產品都幾有興趣。
首先，唔知邊個人咁有諗頭，窩輪係期權既變種，佢仲可以變多變，加入回收價呢個條款，造福廣大既散戶，等佢地啲牛熊證跌到好殘既時候唔好抱有幻想。一到咗回收價即刻幫你止蝕，一仙又好、兩仙又好，唔該唔好喺道磨難，攞返啲錢再去賭過第二隻。等啲發行變相可以做多啲生意。
第二，佢地既宣傳又令啲散戶真係相信佢地啲牛熊證真係無溢價，唔會輸引伸波幅。至今日為止，我都唔明點解一樣既underlying asset，同樣既年期，點解會有唔同既引伸波幅，除咗係發行商用一啲好似好專業既名字去掩飾佢地既操縱外，我實在諗到一個形容詞去形容呢樣野。對於一樣子虛烏有既有既野，佢地又形容為牛熊證既另一優點，宣傳技巧近乎完美。
但現實世界牛熊證會唔會受波幅影響？如果我話俾你知今個月恆指一定收21000(百分百肯定，絕無偏差)你估仲有邊隻衍生工具有溢價？時間長、波幅大，衍生工具自然有溢價，牛熊證又點無？
最特別既係報紙成日寫牛熊密集區，話大戶會造到某一個位，而事實又經常出現啲秒殺事件。如果我係一個牛熊證買家，一見到報紙話邊道邊道係密集區而我自己又有呢啲貨，我仲走夾唔抖？反而乖乖地企喺道受把？散戶係注定俾大戶食啫，但未至於蠢掛？
對於牛熊證既問題、除咗肯定佢對散戶唔公平之外，有一大堆問題諗極都係唔明。
講下講下又差唔多月尾，係時候為下一次既期權短倉部署。首先要定下一啲大原則，以便自己唔會喺股市波動既時候進退失據。當然，喺一啲特別既情況下，可能會有特別既處理，但整體上都會跟住大原則去做。
首先，期權倉既目的係以賺取現金流為主。操作方式係以被動方式進行，所以唔會係主動咁經常買賣。
另外，只會做短倉。主要目的係賺取溢價，即係時間值同波幅。因為溢價到咗期權到期日都會變成零，原則上只係短倉揸到尾(除咗被人行駛)，呢部份係穩賺既。
喺正常既情況下，貼價期權會有最高既溢價，所以無論睇好定睇淡，都係沽貼價期權為主，盡量避免超價外期權。
如果期權短時間之內已經升穿或跌穿目標價，就會考慮換碼，否則每個月只會有一次買賣。
至於勝負方面，每個月都會獨立計算。避免因為接受唔到失敗既痛苦感覺而胡亂轉倉。
如果係股票期權，一般會喺每個月最後一個星期轉倉，因為期權倉只係做期權，除非被對手行駛，否則唔會接貨。
如果係係恆指期權，一般會揸到尾，等佢自己結算。
喺每次沽出期權既時候，都會預留3倍按金。主要目的係避免喺波動既市況下被胡亂斬倉既機會。
作為止蝕既措施，如果第一次俾人call margin，就會先平一半倉。如果再call，就會即時離場冷靜一下，到下個月先黎過。
基本上係咁多，如果有變既話，會盡早列出作為參考。
今日咁啱行過中環獅子錢莊總行，見到仲有好多帳篷擺喺地下既廣場道，先至醒起呢個已經無乜人理既活動仲未完結。
講真到目前為止，我都未知(亦都無興趣花時間去了解)呢個行動既訴求。抗議金融機構貪心？將有毒資產打包賣俾散戶？銀行高管既巨額花紅？當局監管不足？
啱，如果你地係為咗抗議以上既金融不公平，中環作為香港既金融中心，你地去佔領都好應該，但係唔該你地去國金二期，唔好再黎蝦呢隻過氣獅王喇。
衆所周知，金管局同埋一衆投行既總部都係集中喺國金二期，獅子錢莊既投行業務，行內人都認得佢係老鼠喇。至於有I kill u later，得罪啲講句，都唔係俾你同我一戶散戶玩。果班輸打贏要既有錢佬早已經揾咗啲忤作黎做show，又夾埋金管局呢隻縮頭老鼠黎打壓銀行賠錢，駛乜要你幫手佔領中環吖？
巨額花紅？如果你要抗議既話，請去佔領倫敦，因為香港除咗攞你命3000之外，其他野都唔駛講喇！
講真吖，獅王而家真係弱勢畢露。換轉佔領中環既行動喺國金樓下紮營？仲唔俾班差佬一二三掃走晒？但而家只搞你獅王，陳總梗會叫啲差佬留留手，費事班友無家可歸，真係去冲擊國金咪麻煩？
可憐既就係一班返中環總行既員工，做野已經日日無停手，仲要忤作、棺材、大聲公、廢青輪流滋擾。
佔領中環？除非你真係去國金喇，如果唔係，請放過獅王同一班員工，多謝。
除咗著名既x大師之外，相信每個人身邊唔多唔少都總有一兩個明燈，如果細心觀察或多或少都可以幫到自己。
對於明燈既類別，我覺得有長著既明燈同偶發性既明燈。長著既明燈，屬於一啲長期參與市場既人，但對於基本功無乜段練，買賣通常都係憑感覺、聽朋友或財演既推介(唔好對號入座，我講緊自己)。呢類明燈既殺傷力唔係好大，因為如果佢地成日死，早已經離開市場。但係呢類明燈通常都係贏粒糖、輸間廠既人。每次市場投資氣氛高漲既時候，呢類朋友都會同你講贏咗幾多，甚至乎同你推介下股票(通常都係啲佢已經上咗車，而表現唔錯)。其實佢地從來都無諗住揾你接火棒，但不幸地到咗呢個階段，水位都剩番少少，結果高潮一過就一齊坐艇，而推介活動亦大幅減少，只係偶然同你哭下股喪或者小注買啲乜。
另一類明燈發既訊號就強烈得多，口呢一類通常係一啲相對保守既人，對於要投資既資產類別(例如股票、樓房)都會間不中睇下(但一樣基本功都唔係好紮實)，佢地通常都見過上一次既市場滑落，所以喺下一次市場上升初期都唔係好信任，直到有好多證據之後就開始小注入市。開頭都個有唔錯既利潤，繼而就會加大注碼。最後佢地都會化身股神一族，參與投時間同精神越來越多，到最後唔駛講啦……
呀，仲有一種偶發性明燈，平時唔多講股票，但一講係941會跌，佢就升到澎澎聲，要夾死個明燈為止，唉……
繼早前因為博士蛙出事而受拖累既青蛙王子之後，呢個星期多隻持股因為相繼觸及止蝕位而被震出局，包括吉利、中國光纖同埋今日將會陣亡既第一視頻。如果市況無大改善，光大國際同比亞迪都好快一齊上路。手頭上就會剩番啲大路既建行、港鐵、越秀房產同SOHO中國。
唔知係湊巧定係其他原因，剩番落黎既股票都係現金比較多既公司，當中地鐵更加喺上星期見過高位，當然最合理既解釋當然係係市況唔穩定時，資金會從高增長既公司流向防守性高既股票。而呢個就令我更加堅信個市要調整既想法，至於我會唔會成為最後一個沽貨既散戶，大市就此回升而再破高位，要到日後先知。但既然已決定跟往既定既原則去做，就只可以做到底，免得自己反反覆覆，更加進退失據。
唔講唔講都要講下隻中移動，琴日基本上係靠隻中移動單天保至尊先可以輕微跌30點。呢個情境啱啱係兩個星期前出現，當然頂完之後就慢慢散返落黎，至於今次會唔會一樣？無人知，但有咗上前既經驗，今次就會用新既止蝕機制，一俾人call margin就走一半，再call就走晒，希望唔駛用喇！
諗到個題目都覺得自己有啲瘋狂。但喺科技日新月異既情況下，想法瘋狂少少都得掛。
其實幾年前我用咗新一部iPhone開始，我就覺得流動電話市場即將有番天覆地既改變，因為手提電話唔係剩係打電話咁簡單，憑著app store既配合，普遍市民對手提電話既倚賴性只會有增無減，而且只會令市場更加集中，因為如果你用多咗apps，你就會覺得轉換去另一個平台係一件好困難既事。
好多而家我地認為好方便既野，其實喺 Nokia雄霸手提電話市場既年代已經有，例如聽歌、打機、影相，甚至上網，當時好多手機已經做得到，而且當時3G已經推出。點解Nokia會輸俾後起之秀蘋果呢？我覺得最大既原因就係平台！
當時用3G既時候，我好覺得iPhone既定位唔係一部可以上網既電話，而係一部可以打電話既流動電腦，就係呢個小小既分別，就令iPhone突圍而出。
可憐當時既Microsoft仲未睇到呢個大趨勢，仲喺道諗點樣當桌面既Windows塞入去部手提電話道。而Nokia既Symbian仍然係諗緊點樣將手提電話既平台擴充去接受更多功能，結果係點，已經唔駛再講。
至於點解我會忽發奇想覺得Google會食鬼咗Microsoft？因為Microsoft喺呢場平台既戰爭已經徹底咁輸咗，雖然佢而家同Nokia聯盟搞手提電話，但龜仙人同牛魔王既合體，又點會夠孫悟空同斯路打吖。好可能出現既情況係Nokia終於頂唔順，放棄同Microsoft既聯盟，轉投Android既陣型，繼續搞佢既廉價手機。
而Microsoft呢？因為喺流動平台上既失利，喺雲端市場更加毫無寸進，而隨住越來越多人放棄個人電腦，令佢亦無地方可以發展。但Microsoft勝在喺office軟件上仍然賺好多錢，變成咗百份百既現金牛。
最終結果係有互聯網優勢同有個人電腦優勢最終聯手對抗蘋果霸主(雖然三間野本身都好多錢)！
今日上Facebook，發現原來Galaxy S2已經可以upgrade去Android 4.0。雖然我已經經換咗Notes，暫時應該未有得upgrade往，但我相信Goolge喺os開發上面已經取得重大突破，今晚決定將手頭上既美股換晒做GOOG！
如果你一直用開iPhone既話，應該從來無諗過升級手機或者os既問題，因為iPhone本身可以用itunes backup之後，再將新機喺itunes restore，咁就可以好輕易過度去新機。
但如果你係用Android既話，過程就無咁輕鬆。因為每一間廠做Android機既時候，都會做一啲自己既customization。好似HTC就有sense，而Samsung就有Social hub。當然手機商咁做，最大既原因就係想喺同一既平台上突出自己，但另一個更加大既可能性，就係Google喺最初開發os既時候，著重於性能上既開發同修正，至於可携性上就無咁注重。所以喺最初既時候，大部份既手機都無得升級os，如果想用新os既話，就要買過部新手機。
而買咗新機之後，煩惱就開始喇。雖然我已經用緊Google contacts 同 Google calendar，換機既時候已經搞少兩辦，但手機既app同bookmark就無得帶過新機(雖然坊間有啲apps可以幫手，但始終唔係太方便)，結果就要揾番幾日搞搞部新機，所以換機都多咗啲考慮。
另一方面，手機製造商都想消費者為咗新os去買新機。從供求兩方面都無好大既誘因去令手機製造商提供或者研究os升級。
但今次Samsung作為Android既market leader都去搞os升級，相信係Google已經解決咗大部分可携性既問題，尤其是係Google已經買咗motorola，遲啲唔使靠Samsung造手機。令到Samsung知道唔搞升級去增加用戶既歸屬感，就可能會面對消費者流失既問題。
所以今次既升級，唔止係單純Samsung既服務提升咁簡單，亦可能係預示更多手機製造商加強Android動力既可能性。
至於會唔會打低iPhone？我唔知，但我相信教主既憂慮會成真，Android會嚴重咁影響iOS既壟斷性！
過去幾年，中移動既股價相對於聯通既股價黎講黎講，都係處於捱打既狀態。原因並唔係中移動賺錢唔夠聯通多，而係聯通有3G概念，用既3G制式又有強大既手機支援，首推既當然係iPhone，相反因為國策既傾斜，需要發展強國自家既LTE制式，所上喺市佔率上不斷被蠶食。
好喇，到咗聯通被炒得七七八八，而業績又因為要補貼iPhone而倒退既時候。大行又轉風向，話中移動有4G概念，市佔率同ARPU可以上升幾多幾多……我心裡面就諗想番好多年前和記電信揾黎明賣既電話廣告。
對年3G喺香港啱啱推出既時候，推既並唔係手機上網，而係視象通訊。當年我都曾經喺手機會芒仔入面同屋企人、朋友玩視象。當然呢啲好睇唔好食既野，好快就玩完。過咗幾個月之後，大家又返番去用手機打電話、send短訊呢種原始狀態，至於3G plan?有，但係仍然係小衆玩意，喺旺角街頭啲推銷員，仍然用緊2G計劃喺道鬥平，同一時間，數碼通同和黃既股價仍然浮浮沉沉…… 就算數碼通返呢一、兩年醜女大番身，都係因為攞到iPhone分銷權，令用戶人數同ARPU上升，先至可以咁靚女。
雖然話4G有幾快幾快，但除咗快之外，4G仲有乜野賣點可以令佢大番身？我唔知，但歷史話我知，與其買中移動搏4G，不如諗下4G會帶黎乜野轉變，可以幫到邊啲公司，例如電信設備股咁仲好喇！
雖然我從來都唔會根據財演既投資建議，但我真係好鬼鍾意睇佢地寫野，因為每次佢地吹埋同一樣埋既時候，都係爆㷛既時候。今年成日話龍B效應，兒童用品股有運行，轉個頭即刻整單博士蛙(1698)爆㷛案你歎下。
關於一啲由於壞消息而俾人質爆既股票，好多時我都會檢視係唔係一個入貨既好時機。當然撈底與否，好睇爆㷛既原因同埋公司本身既性質。好次今次博士蛙本身係民企，而且爆㷛既原因係本身賬目既問題，所以都係唔掂為妙。
當然另一樣就係爆㷛事件對公司本身有幾大影響。我仲記得早一、兩年既霸王同味精拉麵既問題，因為會影響到消費者對產品既信心，所以都係唔掂好過掂。
相反如果事件對客戶既消費無乜太大影響既話，好似同霸王差唔時間出事既紫金礦業，雖然當時都俾人罰錢、停產，但當問題解決之後，佢原本既生意都唔受影響，所以就做成咗一個買入既時機。
其實今次博士蛙累及青蛙王子(1259)既股價急挫，同青蛙王子本業一啲關係都無。至於買唔買？自己諗清楚喇！
話說2012年2月16號夜深，一條友搭緊地鐵既時候，忽然間有一種好強烈既感覺，與其搭地鐵無無聊聊咁上網，不如趁搭車既時候寫下野喇。反正搭地鐵既時候，多數時間唔係上網就係瞓覺，寫下野除咗可以將自己既諗法同人分享之外，又可以整個 ad sense 戶口玩下，了解乜野係網上廣告(但好不幸今日個ad sense戶口仲未開到)，於是乎就開始咗寫第一篇blog。
不知不覺間，已經寫咗一個月，除咗星期日放假之外，基本上每日都寫到一、兩篇。當然開始寫既時候都已經有好多負面諗法走出黎：會唔會好快無野寫？寫咗有無人睇呀？會唔會俾人插呀？基本上全部都有擔心，但後尾再諗一諗，有問題咪有問題囉，反正要放棄既又唔係太多野，反正好多時搭車既時候上網都係平時唔睇既無聊野，故且試下啦！
一個月落黎，寫咗40篇文，有啲話題比較多人睇(例如股票)，有啲係平時唔會好多人講(例如宗教)。每一日都無特定既目標，好多時都係諗起想寫乜就寫乜，反而有啲連題目都諗埋既，到而家仲喺個draft box道。所以話題呢樣野，暫時都未係問題。
寫多咗幾篇之後，反而開始諗點樣可以俾多啲人睇。於是有人提議放喺facebook。講真到而家都會怕有人覺得我日日擺條link喺道好煩，但facebook既好處係你唔鍾意咪唔好睇囉。於是我又日日喺道煩下各位喇。
另一方面，我又將啲文章放喺唔既地方，例如baby kingdom同骷髏會，結果發現baby kingdom無乜人有興趣，反而骷髏會就幾多人睇，尤其係寫到期權爆廠既一役，仲有好多人提供議見，真係達成咗交流既目的。
一個月落黎，都算係係有得著既。總之唔諗咁多，寫住先啦。
