share 睇電視都要政府介入？

唔經唔覺，今年又係四年一度既奧運會，而今年倫敦奧運既香港轉播權由有線奪得，原本有線打算喺佢既免費頻道播奧運，但由於政府遲遲都未批出牌照，令到有線可能只會喺收費頻道播。而如果無線同亞視唔向有線買轉播權，咁大家就可能無得喺任何免費頻道睇奧運。

當然呢啲時候，又係啲議員出黎抽水既時候，話如果只係得收費頻道播，大部分既市民就無得睇奧運，政府應該介入事件。

其實睇奧運都係欣賞健兒既體育精神同比賽當中既刺激性，再深層次啲咪包括愛國愛港精神，為中港同胞打打氣，係咪真係涉及咁多公眾利益呀？如果大家真係咁認真支持，點解唔可以訂有線去欣賞節目，話晒人地有線都係真金白銀買個轉播權返黎，如果無線同亞視計過條數係值既，自自然然會同有線買轉播權，如果唔俾個合理價而要政府揼有線，咁不如好似大陸咁，由政府統籌所有大型節目既轉播權然後分餅仔俾各大傳媒？

其實我都係無病申吟，講下笑啫。因為我唔想再多一、兩個乜鬼轉播權管理局既高官俱樂部，再加埋啲議員得閒無野做又去爭取政府補貼家家都要有100吋3d電視睇奧運，再加埋法定兩星期假期去睇世界杯……