今日有個同事問我呢排股票有無斬獲，我話有：少少啦，而家都好少買賣。跟住佢就問：呢期無玩股票嗱？我即刻諗起，响大部份香港人眼中：
1)股票係要黎玩既
2)買賣股票要好投入，即係要成日講
所以我既機械式操作第一大失點而令人好難接受既，就係悶。因為無論股票種類、買賣方式，以至買賣時間都已經預計咗，除咗每日要花15分鐘update個止蝕價或者發出止蝕盤外，基本上你係可以成日都唔望個市一眼。對於無㩒過股票機等於無參與既人黎講，好鬼容易悶死。
除咗呢樣之外，呢個操作最怕既就係上落市，因為股票可以喺你買完之後就急瀉，等你止蝕完之後再衝返上黎，結果你就個個月徘徊喺買貨同止蝕之間。
至於另一個缺點，就係喺大升市(好似最近幾個)而你未買夠貨，例如你只係買咗一半，礙於每次買貨都要等一個月，手頭既現金就享受唔到大市既升幅喇。
但我自己諗得出黎，梗會有好(或者覺得好)既地方。尤其係啱啲比較騰雞既人，至於係乜？下次講。
寫咗18篇之後，開始有啲乾塘既感覺，唯有挨得幾耐得幾耐啦。
琴日講完，點樣用先選股，加埋嚴格止蝕同埋機械操作，點樣可以令懶人都可以買股票而唔會無所適從。有朋友第一時間問我work 唔work？基本上呢樣野只係做咗幾個月，而呢幾個月整體大市又向上，所以有錢賺都係關個市多過操作模式事。我諗最少要經過一啲大上大落之後先話得埋work 唔work。
曾經睇過方元既專欄(第一桶金，又停咗)講過，投資係長期既戰鬥。當個市旺既時候，總會出現好多股神(尤其是喺你身邊)，而散戶投入程度亦都最高。但當個市回軟既時候，呢啲股神就會歸位，而一衆散戶就開始輸錢，跟住就將啲蝕本貨放喺櫃底，對於個市不聞不問，往往就會錯失低位反彈既機會。到再入場時，可能又係另一高峰。周而復始，就會做成咗最唔鍾意但成日做既高買低賣。
亦都係呢個原因，點解我會想設計一種機械式操作，去打破呢個心魔。
之前講過我既止蝕標準同埋揀咗乜野股票作長期持有，下一步就要講下我既買賣策略，唔擔保唔會輸，但仍然以唔好一舖清袋為目的。
當年我決心開始止蝕不止賺之後，賣股輸錢已經唔係一個好大既難關，只要隻股票由高位回落10%左右，就落定個止蝕盤，到咗大禍臨頭既時候，就會有電腦幫你了斷，真正做到無痛死亡。
但問題又黎喇，雖然你今日止蝕咗(其實唔係次次蝕，因為有啲股票會升幾十%先回15%)，但你攞返舊錢又點算好呢？幾時同咩野價位買返呢？如果聽日就買番，做乜要止蝕呀？如果遲啲先買，又遲到幾時呢？
好彩我都算係一做好友，我認為只要一日仲喺市場道，一日我都有機會遇到我既十倍股。而一隻真正既倍股唔會因為你遲咗一兩個月買就失去價值，所以我又發揮懶人既思考藝術，定一個機械式既策略去運用手頭上既資金。
其實呢個操作非常簡單，首先我會將手頭既資金分做12份，目的係分12個月入市。然後再將每月既資金分做10分，去買10隻目標股。買入之後就根據最高位回落15%呢個法則去止蝕。如果真係咁唔好彩喺中間止蝕咗，就將筆錢掟番入個pool到再分配。原則上越强(或者穩定)既股票就會越來越多，而相對弱既股票佔既百分比就越來越少。而最大既好處如果個市反覆向下時，手頭上既現金就會分段增加，又唔怕錯過止跌回升既機會。
當然呢個世界係無完美既，當中既缺點，下次再講。
琴晚有幸參加咗西灣河堂區主任司鐸龍家神父既最後一台彌撒。喺彌撒上歌詠團無得到龍神父既事先同意下送一首歌俾龍神父(雖然唔知係乜歌，但真係好好聽)。而龍神父亦喺無根據正式禮儀既情況下，請各位教友向上主為佢祈福。來自各個龍神父曾經服務過堂區或團體，一共幾百人一齊幫佢祈禱。雖然我仍然未係一個正式既教友，但都覺得當時既場面好感動。
龍神父本身係意大利人，黎到香港工咗12年，而三年前開始喺西灣河聖十字架堂出任主任司鐸。由我2010年開始慕道呢段時間同佢既接觸並唔多，所以當我知道佢返意大利既時候都無乜特別感覺。
直至琴日我參加咗佢既歡送禮，見到好多黎自唔同地方既人都特登黎到西灣河歡送佢。我突然間諗，好多人喺同一間公司做咗好多年(包括我自己)，如果佢要離開，其他人既反應會係點？當然作為一個神司，為叫咁多人服務，當然會有唔少擁戴佢既人。但其實我地大部分每日都會工作，或者為好多人服務。但除咗你既上司之外，其他人又會點樣評價你呢？係好朋友？好同事，定係一個麻煩既人？同樣道理，係你既朋友、親戚眼中，又係一個乜野既人？
好多人本身已經富甲一方，但點解佢起既樓仍然俾人批評偷工減料、售樓書往往被人話誤導？旗下既超市又全方位向供應商、小商戶壓榨？
我唔知答案，只係多謝龍神父俾我一個反思既機會。
保重了！
如果你知道今日既標題源自邊道，相信你都係(或曾經係)一個電視迷，同埋你年紀都應該唔細。
曾經有一段時間，我諗過有無一種股票投資方法(無論係正股加衍生工具定齋衍生工具)可以做到無論做市升定跌都可以有錢賺。當然最接近既就係沽空期權，因為可以賺時間值同波幅。但經過數次既實驗同閱讀過其他網友(包括已删除既小旋風同已停寫既以權供樓)既文章之後，發現喺每一次沽出既時候你都已經選定咗一個方向(大升、大跌、定牛皮向好、向淡)。所以我後尾都放棄咗無估方向都可以有錢賺既念頭。雖然係咁，我都無好似啲財演咁日日估個市升定跌。
原則上我而家做市都係以月做單位，因為我每個月只係估出一次期權，之後就由佢喺到吽，直到下次轉倉既時候先再估過。中間時間所留意既新聞同閱讀，原則上只係令自己浸住喺個市道，等下次再估時有啲根據咁解。
至於我對今年股市既大方向諗法(雖然已經遲咗)就係第一個高點會喺首季出現(基本上我覺得已經出現咗)，然後喺第二季喪插，直到第三季再升過，全年以升亦作結束。
點解我會咁睇？個標題咪話咗你知囉！
相信好多人都聽過刀仔剧大樹，即係用好少既資本去謀求好大既利益，生活上最容易揾到既就係買六合彩。我自己都有一條買咗十幾年既六合彩，雖然到而家最叻都只係中過四個字，但係我都期待有一日中正個金多寶，咁就發達囉！
同樣地，股票市場上有好多人鍾意買窩輪，都係希望以小控大，一舖過賺幾倍、甚至幾十倍。除咗少數專業、日日住個既炒家之外，我又好少聽到有人可以揾到好多錢，除咗因為衍生工具難揾食(首先每一秒都輸緊時間值)之外，好多人都係攞少少錢出黎玩下，就算贏到幾倍都可能只係佢冰山既一角，旨在輸咗都唔肉痛咁解。總括黎講，都係輸多赢少多。
好多時我會諗，如果大部份人都剧斷或者剧爛晒啲刀仔，咁邊個最大得益？好明顯就係啲窩輪發行商啦！無可否認，佢地既實力同資訊比一衆散戶多，但佢地最大既優勢，係佢地會用好大既資本(雖然好多係借返黎)去賺你班散戶既錢。原理就同賭王一樣，唔怕你班散戶赢一次半次，最緊要係各位散戶肯繼續黎玩，對佢黎講，就好似用把關刀削樹葉咁，削極都唔斷，雖然每次都賺得少，但長玩長有嘛。
可能好多人都唔知道，巴菲特既致富秘訣並唔係buy and hold 可口可樂或者吉列，而係靠保險業提供穩定既現金流，令佢可以有强大既防守力去面對逆景同埋擇肥而噬。例如喺金融海嘯時買入高盛既優先股(好多人話「入股」，但其實只係放貴利)。
保險既理念就係普通市民驚有一日天災人禍會降臨自己身上，所以就每個月俾錢保險公司去買一個權利，到自己有乜東瓜豆腐既時候，就可以向保險公司索賠。(所以我從來都贊成買儲蓄保險，至於點解？遲啲講)
基於想為自己製造一啲類似保險既現金流，兩年前我開始賣期權(只係賣、無買過)，主要既目的都係同保險公司一樣想賺取時間價(同波幅~有少少深，有機會再講)。同買保險一樣，股票市場上面有好多人有大量長倉，想揸住股票等升值時又伯佢跌，於是乎就買一個反方向既期權去對冲，於是就出現咗期權市場。
而作為一個賣方，我每個月沽出一個期權，就可以印印腳等收錢，因為作為一個保險，只要持有人唔行駛佢既權利(即係索償)，咁我所收既期權金(即係保費)就可以袋袋平安。
當然會有人問：嘩！萬人真係發生天災人禍咪即刻輸爆廠？係架，我都有諗過呢個問題，雖然我仍然未諗到解決既方法，但我始終覺得刀仔剧大樹(即係買窩輪、期權)贏到最尾既人好少，只要我掌握多啲技巧，我始終會成為一個成功既保險商(即係期權賣家)。
相信香港大部份既人而家都用緊智能手機，加埋平板電腦既普及，將來會越來越少人用普通電腦(無論係桌面定係手提)上網。我有時會諗，對於將來既世界有乜影響呢？
撞啱Facebook就黎上市，就想講下我諗到既其中一個問題。講真，我對於Facebook既商業模式並唔係太清楚，只係知道佢係靠喺網上賣廣告同理網上遊戲收入分賬。當越多人用既時候，可以賣廣告既機會就越多。
但自從我自己用咗智能手機之後，我主要都係用手機既apps上Facebook,雖然我覺得佢個apps好多問題，但我都無諗過要用番部電腦上Facebook，因為上Facebook始終都係消閒既事，唔好太計較個apps既表演。
好喇，問題黎喇。如果好多人都係我咁諗，主要用手機apps上Facebook,咁網上板既瀏覽就會越來越少。而各位用過apps都知道手機版係無廣告既，咁Facebook又點賣廣告呢？
其實唔少靠網上賣廣告既網站都面對同樣既問題。究竟點樣喺智能手機興起既情況下揾到商機，我真係好想知答案。
喺我話俾同事聽我開始寫blog既時候，有同事第一個反應就係：乜你仲有時間搞咁多野？
講真，一開始寫既時候係憑住一股蠻勁：好想、好想寫下野，話之佢幾日先寫得一篇，甚至寫完兩三篇就放棄，但寫過總叫係寫過，總比繼續只係諗好得多。
但寫完第一篇之後，發覺寫blog 並唔係想象中咁困難，可能係因為我本身識打倉頡，可以做到差唔多諗到就寫到，所以實質要用既時間並唔多。我每一篇blog 其實都只不過係用一程地鐵既時間(西灣河至奧運)既時間打好，當然快既代價就係有錯別字同有時唔知寫乜。但如果我叫你用半個鐘「諗」一篇野，相信好多人都做到，我既優勢，只係打字比其他人快，所以先有可能完成好多人認為不可能既任務。
其實同一道理套落投資上面都可以，好多人都面對資金有限(我相信連李首富都有覺得自己唔夠既時候)但慾望無限既時候，都會「諗」如果我有更多錢就可以捕捉到呢次機會、果次機會。
好幸運地喺過去既一年面，我認識到好多有夢想既人，當佢地面對有限既時候，佢地唔只會喺到發愁，而係用無限既創意同本身既優勢去追逐佢地既夢想。當你有無限既創意同毅力去面對時，就會變成用無限去追逐無限。
有個朋友幾年前已經開始同我灌輸一個「can do」既理念，開頭既時候我都幾抗拒。但見得多試得多之後，我發覺只要肯試，你一地會有收獲，縱然可能好少，甚至未必係你追求既，但你一定會唔一無所得！
早兩日講過939同546，今次想講下另一集持股：257光大國際。
好多人鍾意買國策股，例如家電下鄉時買海爾、建高鐵時買南車時代、建保障房時買海螺。但我好少為咗國策而買股。因為好多時當我醒覺有呢啲股票既時候已經炒到天咁高，二來國策好似無乜延續性，除咗每年都例牌吹下既三農之外，其餘啲國策年年都唔同，相關既股票都係有今生無來世，熱潮過後好多都打回原型。搞到要成日睇住，唔係好啱我呢啲懶惰型既性格。所以又係啲講多過買既股票。
但係點解我會買257？最大既原因係因為我幫襯過李首富買過一個心懭神怡既單位。從此就好關心垃圾堆填既問題。香港同全世界好多城市一樣，固體垃圾既增長速度永遠都快過可以處理既速度，結果就係一個又一個堆填區填到爆晒。我地偉大既祖國當然都面對住同樣既問題。
我當時心諗，反正都堆唔晒，不如一把火燒晒佢咪一了百了。但世事又點會咁簡單吖，垃圾喺燒既時候會產生大量既有害物資，對環境造成一定既影響，亦都係呢個原因，香港都將所有垃圾焚化爐執晒。
但有人辭鄉歸古里，有人漏夜趕科場，咁啱我見到光大國際轉型搞環保，當中包括垃圾發電，仲要好有型咁寫到市政府俾啲垃圾佢處理又有錢收，燒完垃圾發既電又有國家保證上網費，用既又係最新科技，污染程度好低。嘩！神州大地咁多垃圾(包括人)，咪有排都未燒完？於是又唔睇下垃圾發電實際可賺幾多錢，佔公司盈利有幾多，有乜野風險既情況之下就買咗。
當然呢隻股票既波幅都幾大，我又試過一次又一次俾佢震咗出黎，然後又再買返。但只要間公司一日喺道燒緊垃圾，佢都一日會喺我既名單上，因為中國實在太多垃圾喇！
琴晚將用咗多年既股票tracking由editgrid搬到google docs。搞到唔係好夠瞓，而家仲矇矇地。
廢話少講，即該將自己既持股列晒出黎先(排名唔等於持股量多少，只係諗到邊隻寫邊隻)：
546 阜豐集團
939 建設銀行
257 光大國際
405 越秀房產信託
1211 比亞迪股份
3777 中國光纖
1259 青蛙王子
410 Soho中國
175 吉利汽車
82 第一視頻
66 港鐵公司
喺無乜特別既情況之下，黎緊呢一年你都唔會見到我既組合有乜大變化。變既最大可能持股量既多少。所以當我既朋友提議我做個百萬倉時，我會感覺到有少少為難。
你可能會問：點解你咁肯定自己既組合唔會點變呢？其實理由好簡單：無乜錢。因為香港既上市公司有成二、三千間，一般人根本無可能買晒所有股票。幾年前我都試過用有限既錢追逐無限既股，高峰時曾經有超過20隻股票喺個倉道，直頭連有人問我揸住乜野股票時，我自己都答唔晒。後來拜讀過其他大師(包括林森池同曹仁超)既文章之後，明白到其實自己唔應該持有太多種類既股票。因為一來你唔會有時間逐隻去了解每隻股票，二來佢地既成功之道都係專注某一啲股票，喺適當既時候買入(仲要係大大注果隻)，定時檢討公司既質素同股價既表現，將好既公司留低，將弱既或者公司質素下降既股票踢走，專注於强者身上。更多既選擇，只會令人更加迷失，於是乎我就開始改變自己既習慣：未買既時候就隻隻都睇，但到真金白銀落注既時候，黎黎去去都係果幾隻(除咗間不中手痕買之外)。
但係仲有一果壞習慣未改，就係我都唔係100%肯定上述公司做緊乜。揀既時候都係憑感覺、聽人講。年報？Sorry,無睇過。
今日繼續講邊間公司令我食唔到阿里巴巴呢舊肥豬肉。佢就係鼎鼎大名大名既富士康喇！
富士康之所以出名，相信最多人記得佢係血汗工廠以及連續17跳。而另一樣最廣為人知既就係蘋果既iPhone 同iPad都係由富士康代工，所以每次有蘋果既新聞，好多人都會講富士康。但最奇怪既地方，就係無論iPhone同iPad點樣大賣，富士康既業績都不停咁向下滑。
當然稍為對呢間公司有少少研究既人，都知道幫蘋果代工既並唔係上市既富士康國際，而係郭主席自己既富士康集團。而富士康既主要客戶，反而係曾經紅極一時既諾基亞。而家諾基亞乜野環境，相信都唔駛我多講，連帶佢既代工生產商，都應該無乜好日子過。但每次啲散戶(甚至部份財演)將蘋果同上市既富士康國際拉埋一齊既時候，上市公司都從來無澄清過，任由你地當兩者係有關系。掛住個羊頭賣緊豬肉(因為佢無犯法)，你班散戶自己唔睇招股書，總唔可以怪郭老闆無講清楚，吹咩！
自從知道上市公司同母公司可以同名而故意令投資者誤會之後，我就會望一望啲筍野有無上市，亦間接令我錯失咗今次既黃金機會。
拖咗兩日，聽日就公開下我既持股喇！
今日聽到第一個壞消息，就係阿里巴巴母公司宣佈私有化上市既阿里巴巴。
其實今次私有化對大部分小股民黎講並唔係一件壞事，因為母公司係用大約4成半既溢價提出收購，同當年既上市價差唔多，換句話說，只要你當年無喺上市狂炒既時段入市，加埋已經派咗兩年既股息，大部份人都應該可以賺住走。
但點解對我黎講係壞消息？總括黎講，只係我自己又走咗一次寶。話說我舊年揀緊自己既10隻持股時，咁啱我又開始喺淘寶買野。當時我真係眼界大開，原來淘寶真係咁多人買賣，而且再加埋一個差唔多獨市又應該係好龐大既現金池-支付寶。再加埋中國呢個世界工廠既背景，淘寶同支付寶既生意應該發到無人有，於是我拿拿臨去睇下阿里巴巴幾錢喇。咦，又唔係好貴之喎。正想落order既時候，突然間諗起：究竟淘寶同支付寶係唔係上市公司既業務黎架？結果知識改變咗命運，當我認真見下上市公司既業務時，發現上市公司只係做B2B既生意，增長潛力最大既淘寶同埋支付寶根本仲喺主席既私人公司阿里巴巴集團裡面。
就係呢個原因，我就放棄咗呢隻股票。當然亦享受唔到今次因為阿里巴巴集團股權爭奪戰而提供既私有化賺錢機會喇！
至於點解一向勇字當頭既我會咁小心睇下一間公司既業務，完全係因為另一間掛羊頭賣狗肉既公司。至於係邊一間？下次講。
每個人對於揀股都有唔同既方法。對於愛股更加有唔同既原因，可能係佢令你赢過好多錢，或者佢喺你成長既時期被封為股皇，又可能係你同初戀情人一齊買過某隻股票。對於我黎講，我既愛股係我第一隻無聽過任何人推介，而又贏到錢既股票：阜豐(546)。
話說我第一次認識呢隻股票喺佢上市既時候，當年市場既主題係要龍頭股上市，做姨媽巾既又要最大，賣果汁既又要最大，而阜豐既賣點就係全國最大既味精生產商。但因為當時既市況唔係太好，我聽完之後都無認購呢隻股票，而且都無留意過佢既走勢。
直到零八年金融海嘯之後，我覺得原來所謂既股皇：HSBC、中移動、國壽…全部都係不堪一擊之輩。當時我心諗：究竟有乜股票喺最壞既時候都可以有生意做呢，第一時間喺我心出現既就係一衆公用股，但當我睇下佢地既股價時，又唔覺得佢特別平、息率又唔係特別高。正當我唔知買乜好既時候，忽然間諗起我地將來最大既經濟支撐就係我地偉大既袓國。而當內地人民越來越富裕既時候，通常會做兩樣野：食多啲肉同出多啲街食飯，。於是我就靈光一閃：不如買咗隻全國最大既味精生產商，因為多人出街食飯，即係多咗人食味精喇。於是又唔理三七廿一買咗546。可能撞啱海嘯後期，隻野一買就反彈。於是我又發揮散戶既精神：買完之後先諗隻股票好唔好，原來我當時買既價位已經好殘，股息有成10厘，而生意又唔係好受海嘯影響……越睇越睇，就當咗佢係每日都望既股票，而我同佢第一次交往，亦都係我賺咗3倍既情況下分手。當然我地之後既交往未必次次都愉快收場，但無論如何，佢已經喺我既股票生命佔咗一個重要既席位。
昨日收到第一個朋友既回應，話我不如整個百萬倉睇下。經過同佢仔細研究，我相信自己都無咁既能力，不過我可以公開下我買咗乜野股票同點樣買法。
當然，546仍然係其中一員喇。味精，你今日食咗未？
Bingo!一入黎你已經俾個標題左，呢道無揀股既秘方，因為我根本唔識揀股票，手頭上既貨，全部都係憑感覺、睇財演同聽人講話好先買。既然咁快就諗唔到寫乜，不如寫下自己有乜野股同因乜原因買呢啲股。
首先持股最重既係建設銀行，買入呢隻股票應該係舊年年中左右。其實自從2009年開始就無買過銀行股，因為當時既地方債、房地產既問題一直困擾內銀股。一段時間之內，內銀股都無乜人吼，但壞消息又連綿不盡。身邊既人越來越少人講內銀股。突然有一日，我覺得全世界都唔睇好內銀，連阿公都話地方債有幾嚴重。我就諗既然阿公都出手喇，即係地方債一定會解決喇！咁我就諗都唔諗就買咗，仲要係現價買。市盈率、值搏率、支持位全部都無睇。至於目標價幾多、長揸定短炒？我都答唔到你，因為我既策略只有一個：止蝕唔止賺，只會喺跌低過最高價既15%咪賣囉。聽日股災咪短炒，一日唔跌低過止蝕價咪長揸囉！
雖然建行係持股最重，但其實佢唔係我既至愛。我既至愛，曾經同我離離合合咗好多次，而且帶走咗我唔少財富添……
除咗合併令你差唔多無仇報之外，另一個令你真係無仇報既方法就係私有化。
喺我印象中最多人知又差唔多成功既例子，應該係小小超嘗試私有化8號仔。呢隻喺科網股熱潮中既經典，成為咗唔少香港股民既集體痛苦回憶。因為佢除咗由高位廿幾蚊跌剩個幾之後搞6合1，再由6個幾跌到個幾。即係當年既180蚊跌剩1蚊之外，小小超為咗令一衆小股票有套現既機會，宣佈將8號仔私有化。如果當時真係私有化成功，好多散戶都贏咗(即係長命過佢)，但係投入既真金白銀就係咁先喇。
而成功私有化既例子就更加不計其數：上海醫藥、香港建築等等……
其實除咗自己未必夠股票長命外，好多散戶都唔明白長揸蝕本既股票有好大既機會成本。如果一隻股票跌咗10%，佢要升番11%先可以番本。跌兩成既話，就要升25%先可以番本，跌5成既話就要一倍。如果真係咁唔好彩跌9成，真係要升番10倍先返家鄉。就算真係咁好彩俾你等到有咁既一日，你果幾千甚至幾萬蚊可能貶值到夠你買番粒糖食咋！
既然市場上有幾千隻股票，又何必要因為自己既執著而放棄俾自己改過自身既機會呢？
曾幾何時，我同大部分散戶都有同一個諗法，就係只要間公司唔執，就算我高價買入咗呢間公司既股票，一樣可以同佢鬥長命，只要我唔賣隻股票，就永遠唔會蝕，總有一日股價會升番上我既買入價，咁我就可以全身而退。但經過一段日子之後，我發覺咗樣野實際上唔係好work。以下係一啲例子：
1)合併
喺分行工作既時候，見到好多師奶買啲毫子股，經歷97金融風暴之後遇上科網股熱潮。收埋喺櫃桶底既股票都可以復活，令我以為長揸都有得番身，咁啱我又買咗第一隻毫子股：0067(都唔記當時叫乜名)。聽消息話呢隻野可以升兩、三倍，心諗無死喇。點知我做咗接貨果班，一買之後就直線向下。好喇，既然班師奶都等到，我應該再長命啲掛。於是，收埋當睇唔到喇。點知有一日忽然收到銀行通知，話隻野要合併同供股：無記錯係50合1，再1供5。簡單啲講，如果
我唔供既話，我本身既股票既價值只會剩番5分之一。要升番原本值值既話都要升番5倍！天呀，如果計埋原本既跌幅，咪要數以十倍？於是我唔理三七廿一，即刻沽咗佢。幾萬蚊就得番幾千銀。
而另一陷阱就係有人以為買1仙既股票唔會有下跌風險，因為港交所既規定成交價最低係一仙。但只要經過合併呢一招：先黎個100合1，股價即刻可由1仙變1蚊，但持股數目只係剩番百分之一。股價再由1蚊跌番落1仙，你既投資就好輕易咁得番百分之一。
至於另一招就係私有化，聽日再講。
已經係第二次喇！打到半路中途先變亂碼,唔通真係要收皮？
講番正題,兩年前我同好多香港人一樣,無為自己的投資做紀錄,剩係賺錢既時候歡天喜地,好想好想即刻話晒俾全世界人知。到輸錢既時候就收埋收埋, 甚至自己幾錢買、買咗幾多都唔理。奢望有一日唔覺意攞番出黎既時候已經爆升咗十幾廿倍,當然事實往往係事與願違：爆升就無喇,得番啲灰就有。我3年前用3千幾買咗一手中國星,經過無數次既合併同供股之後,而家既市值係兩蚊！雖然有諗過整走佢唔駛眼怨,但沽出去要俾100蚊佣,提出黎又要俾30蚊手續費。唯有擺住喺道,等佢變番100蚊既時候沽咗佢。
雖然買賣股票我唔算得上好投入,但我都好在乎輸贏,因為一時間既輸贏,可能已經係我幾個月既人工。最記得第一次買窩輪既時候,因為發行商大力宣傳,同埋啱啱喺大學上咗衍生工具既課程,覺得呢樣野可以發達。貿貿然就用咗兩個月人工買咗隻call,開頭都升得幾好，點知過咗幾日個市逆轉，隻輪大跌，我就發揮散戶既精神：同佢鬥長命！結果兩個月之後，正股已經升番上黎，但我隻輪仍然輸咗一半。
經歷咗呢一役，我學識咗唔好買窩輪。但我仍未學識投資上最重要既野：止蝕。
真係好既唔靈醜既靈,一開始寫blog就遇上意外,寫到半路中途(真係寫咗一半架喇！)因為有隻字唔識寫轉用手寫板就即刻出事,全遍野變晒亂碼。出師未捷身先死,可能係叫我留返啖氣暖下肚,唔好多事幹,幾十歲人先學人寫blog。
不過算喇,以小弟既作風,呢篇野都應該唔會寫得好耐,不過都諗咗咁耐,有寫過總比無寫過。
出咗黎做野10幾年,都接觸過唔同既投資產品：股票、基金、外匯、住宅、期權。同好多香港人一樣,玩得最耐既都係股票,但亦同好多人一樣,黎黎去去都係個玩字。基本分析：唔識,技術分析：都唔識。曾經賺過錢,但亦輸返落去。最好彩既係因為細膽,所以都無玩過孖展,未試過輸到要瞓街。
吹過咁耐,乜都無講過。聽日開始,寫下自己經歷過既野。未必人人啱聽,但總叫試過,都可以同人講：我都係一個博客黎架！
