好耐無寫過blog，今日心血來潮寫番篇。
自從JB house興起之後，近一、兩年我都係幫襯呢一類速剪店，除咗平之外，最緊要係快。通常食飯既時候去剪，3、4個字已搞掂，剪完仲有時間食飯。對於我既啲對形象要求既人黎講，直頭可以用快、靚、正黎形容。
今日上堂，講起一間公司應該不停求變，先可以喺激烈既競爭中生存及繼續發展。
突然間我又諗返起JB呢間速剪店，佢既生意模式好簡單，用八達通自助買飛，排隊，理髮師10分鐘之內幫你剪好個頭，然後幫你吹走啲髮尾，搞掂！
如果你有返咁上下年齡，又係草根階層出身既話，對於以上既情節應該唔會陌生，因為呢個正正係我地細個巷內既情況，唔同既只係由橫街窄巷搬咗去店舖。
當然，呢個轉變係咪好創新？唔係。而家速剪店係咪大茶飯？唔係（除非有ibanker睇中佢，幫佢搞上市）。
但創意其實唔一定要係天馬行空既事，亦都未必係講下講下就會發生既事。
好多野要係有需求（或者你能夠創造需求），再加上一種求變既動力（因為你應該搵唔到一條巷俾你開舖），轉變先會發生。
希望每一個求變既人，都搵到發自內心既果一股動力。
上星期差唔多成都係病中渡過，搞到完全無理過任何投資咁滯，本來上星期五見到隻中移動再次升空，今個月既股票期權都應該凍過水，但好好彩中移動今日又表演跳水，單日下挫超過3%，結果俾咗我一度逃生門，雖然仍然要蝕少少，但總算無夾死，繼三月之後，又玩咗一次中移動過山車。展望五月，主題仍舊係五絕，造淡仍然向中移動埋手，所以沽咗@82.5既call。
但連續兩個月既大幅波動，令我更加決定要減少單一股票既投機，下個月會搬啲錢過恆指倉。
至於恆指倉方面，今日急跌差唔多將上個星期既升幅食晒，結果期權又處於有微利既狀態，只要今個星期頂住喺20400樓下，咁最後果300點又可以食埋嘞！
至於期權倉實際表現，今晚稍後更新。
上星期六朝去學配音既時候，遇到有童軍喺街賣旗(好似係幫基督教什麼協助會)。行過幾步又有同一個機構既人賣旗，不過今次就無著制服，應該係童軍團隊要求成員參與時要著制服，但其他義工就無特別限制。
雖然到最後我兩個都無幫趁，但其實個童軍approach我既時候，我有諗過幫佢買枝旗，但另外一個人，我就諗都無諗過。
因為香港而家實在太多掛羊頭賣狗肉既「慈善」活動。好似早兩個星期新聞講有人申請咗「慈善」義賣，但其實都只係做小販，根本無人知啲「善款」去咗邊。
但我有個偏見，覺得童軍、聖約翰呢一系類團體，唔會同啲不明來歷既機構合作。雖然我只係好天真咁將審查既工作交托俾其他人，而自己只係相信對方既權威，但原來大部分人都可能做緊同一件事。
對於某一啲身份，我地都會有一個特定既印象，好似如果你喺醫院有個人著住件白袍走黎走去，好多人直覺上會覺得佢係醫生，而如果你銀行見到有個人著制服而另一個唔駛著，我相信你都會覺得唔駛著嗰個高級啲……尤其是你要投訴既時候，好多人都會對住著制服既同事講：叫你經理出黎！
唔知係唔係同一個原因呢，而家保安員啲制服越來越似警察或者啹喀兵，有次去IFC,見到啲保安著好似啹喀兵咁，真係唔打得都嚇得。
唔經唔覺，今年又係四年一度既奧運會，而今年倫敦奧運既香港轉播權由有線奪得，原本有線打算喺佢既免費頻道播奧運，但由於政府遲遲都未批出牌照，令到有線可能只會喺收費頻道播。而如果無線同亞視唔向有線買轉播權，咁大家就可能無得喺任何免費頻道睇奧運。
當然呢啲時候，又係啲議員出黎抽水既時候，話如果只係得收費頻道播，大部分既市民就無得睇奧運，政府應該介入事件。
其實睇奧運都係欣賞健兒既體育精神同比賽當中既刺激性，再深層次啲咪包括愛國愛港精神，為中港同胞打打氣，係咪真係涉及咁多公眾利益呀？如果大家真係咁認真支持，點解唔可以訂有線去欣賞節目，話晒人地有線都係真金白銀買個轉播權返黎，如果無線同亞視計過條數係值既，自自然然會同有線買轉播權，如果唔俾個合理價而要政府揼有線，咁不如好似大陸咁，由政府統籌所有大型節目既轉播權然後分餅仔俾各大傳媒？
其實我都係無病申吟，講下笑啫。因為我唔想再多一、兩個乜鬼轉播權管理局既高官俱樂部，再加埋啲議員得閒無野做又去爭取政府補貼家家都要有100吋3d電視睇奧運，再加埋法定兩星期假期去睇世界杯……
琴日睇報紙，又有團體出黎話做完研究，話百佳、惠康喺同一地區既貨品，售價都係差唔多，甚至乎同上同落，所以一口咬定兩間大型超級市場聯手定價，剝削消費者。
同我地細果個既時候比較，而家既士多真係少咗好多，好多人都歸咎士多執笠，係因為大型超市上下其手，一方面壓低入貨價同埋收上架費，另一方面又唔俾供應商用低價俾貨士多，令士多唔可以喺價錢上同大型超市競爭。
但唔知大家有無發現，喺傳統士多消失既同時，喺唔同時間都出現緊新既經營者，例如優之良品、零食物語同好識做新聞既759阿信屋。其實佢地所賣既野同我地細個嗰陣既士多無乜分別，都係零食、汽水之類，只不過係門面整潔啲，啲野睇落去新鮮啲，同埋貴啲！
講真，我覺得而家創業既機會真係難咗，但難係唔係難於無機會，而係呢一代既香港人有錢咗，要求高咗。
我敢寫包單，就算領匯肯平租俾你開士多，但係你仍然用舊式既格局去做，即係物種多而亂、啲野成日好似封晒塵咁，過多兩年，一樣會係執笠收場。
上個星期終於換咗個光波爐返屋企，睇咗個簡介，發現參唔多所有可以諗到既煮食方法，佢都可以做到，難怪近呢大半年好多家庭都會買個光波爐返屋企，而Facebook既食譜組群仲有幾千人參加咗添！太座仲已經諗緊將會微波爐送俾人，因為輻射始終對身體唔係咁好，既然光波爐做到微波爐要做既野，倒不如藉此騰出多啲空間。
當我細心睇下個光波爐究竟係咩構造時，我發現其實光波爐都唔係乜野高新科技，原則上係一個上置既發熱器加一個類似康寧既半透明玻璃鍋。
同普通焗爐比較，最大既好處就係個玻璃鍋更易處理同俾你更大既彈性。因為當你要用水既時候(例如蒸、炖)既時候，只須要將水直接注入鍋裡面就可以。而要焗、燒既時候，啲油就會流喺個鍋入便，方便清洗。
相比我以前一個好似洗衣機咁大既焗爐，亦都唔需要預熱，無論喺功能上同節省能源方面，基本上都係一個唔既選擇。太座亦都無浪費一番等待，整咗幾個好好味疍糕仔俾我同囝囝試下。
其實睇到個光波爐，又令我諗起iPhone。點解？下次講。
